जीवनात काही माणसे पदामुळे मोठी होत नाहीत; तर आपल्या साध्या, शांत आणि निष्ठावान कार्यातून मोठेपण प्राप्त करतात. आदरणीय श्री. भाऊसाहेब बच्छाव हे अशाच व्यक्तिमत्त्वांपैकी एक.
कला, वाणिज्य व विज्ञान महाविद्यालय, नांदगाव येथे प्रयोगशाळा परिचर म्हणून तब्बल ३६ वर्षे त्यांनी अत्यंत प्रामाणिकपणे, निष्ठेने आणि समर्पित भावनेने आपली सेवा बजावली. ही सेवा केवळ नोकरी नव्हती, तर संस्थेप्रती असलेली एक निस्सीम बांधिलकी होती. प्रयोगशाळेतील प्रत्येक जबाबदारी त्यांनी कर्तव्य म्हणून नव्हे, तर आपलेपणाने स्वीकारली. वेळेचे भान, कामातील शिस्त, विद्यार्थी आणि प्राध्यापकांशी जपलेला स्नेहभाव, तसेच सहकाऱ्यांशी असलेला मनमिळावू व्यवहार यामुळे त्यांनी सर्वांच्या मनात एक वेगळे स्थान निर्माण केले.
संस्थेच्या प्रगतीच्या वाटचालीत पडद्यामागे राहूनही महत्त्वपूर्ण योगदान देणाऱ्या व्यक्तींचा उल्लेख अनेकदा होत नाही; परंतु अशा व्यक्तींच्याच निःस्वार्थ सेवेमुळे संस्था सक्षम आणि संस्कारित होत असते. भाऊसाहेब बच्छाव यांचे कार्य हे त्याचेच जिवंत उदाहरण आहे. त्यांनी आपल्या साधेपणातून, संयमातून आणि कर्तव्यनिष्ठेतून सेवेला प्रतिष्ठा प्राप्त करून दिली.
आज सेवानिवृत्तीचा क्षण हा एका सेवापर्वाचा समारोप असला, तरी तो त्यांच्या कार्याचा गौरव करणारा सुवर्णक्षण आहे. त्यांनी आयुष्यभर कमावलेली माणसं, जपलेले स्नेहबंध आणि मिळवलेला विश्वास हीच त्यांच्या जीवनाची खरी संपत्ती आहे.
ईश्वरचरणी मनःपूर्वक प्रार्थना की, त्यांच्या आयुष्याचा पुढील प्रवास उत्तम आरोग्य, दीर्घायुष्य, कौटुंबिक सुख, मानसिक समाधान आणि आनंदाने परिपूर्ण होवो. त्यांच्या अनुभवाचा, प्रेमाचा आणि मार्गदर्शनाचा लाभ समाजाला व पुढील पिढ्यांनाही मिळत राहो.
आदरणीय भाऊसाहेब बच्छाव यांच्या प्रदीर्घ, निष्ठावान आणि गौरवशाली सेवेला त्रिवार मानाचा मुजरा!
हार्दिक शुभेच्छांसह…
प्रा. सुरेश माधवराव नारायणे
