महात्मा ज्योतिबा फुले शैक्षणिक संकुलासाठी एका देशभक्त पित्याची अनोखी मदत
“माझा मुलगा गेला… पण त्याने पाहिलेली स्वप्ने आणि त्याचे संस्कार या संकुलात सदैव जिवंत राहिले पाहिजेत!”
सगर विद्या प्रसारक संस्था, सिन्नर संचलित महात्मा ज्योतिबा फुले शैक्षणिक संकुलाचे माजी विद्यार्थी, देशाच्या संरक्षणासाठी अहोरात्र तत्पर असणारे वीर जवान कै. माधव सदाशिव गवळी यांचे अल्पशा आजाराने निधन झाले. ज्या वयात देशसेवेची उत्तुंग शिखरे गाठायची होती, त्याच वयात नियतीने त्यांना आमच्याकडून हिरावून घेतले. एक उगवता तारा मावळला आणि संपूर्ण गवळी परिवारावर तसेच आमच्या संकुलावर दुःखाचा डोंगर कोसळला.
परंतु, “मुलाचे अपुरे राहिलेले स्वप्न आणि देशसेवेची धग” मनात बाळगून, कै. माधव यांच्या वडिलांनी माजी सैनिक श्री. सदाशिव रखमाजी गवळी यांनी, आपल्या पुत्राच्या पवित्र स्मृती जपण्यासाठी महात्मा ज्योतिबा फुले शैक्षणिक संकुलाला रुपये २१००/- (एकवीशे रुपये मात्र) ची देणगी सुपूर्द केली.
एका माजी सैनिकाने स्वतःच्या मातृभूमीच्या रक्षणासाठी आयुष्य घालवले, आणि त्यांच्याच पावलावर पाऊल ठेवून पुढे जाणाऱ्या मुलाच्या स्मृतीप्रीत्यर्थ, तो ज्या शाळेत शिकला त्याच संकुलातील इतर विद्यार्थ्यांच्या भविष्यासाठी मदतीचा हात पुढे केला... हा केवळ आर्थिक निधी नसून, एका देशाभिमानी कुटुंबाचे संकुलावर असणारे अथांग प्रेम आणि अश्रूंनी भिजलेले आशीर्वाद आहेत!
देशाच्या संरक्षणासाठी स्वतःचे आयुष्य वाहून देणाऱ्या आणि दुःखाच्या या डोंगराएवढ्या काळातही शैक्षणिक संकुलाचा विचार करणाऱ्या गवळी परिवाराचे आम्ही सदैव ऋणी राहू. कै. माधव सदाशिव गवळी यांच्या अपूर्ण राहिलेल्या स्वप्नांना या संकुलातील हजारो विद्यार्थ्यांच्या यशामधून पूर्ण करण्याचा ध्यास आम्ही नक्कीच घेऊ!
सगर विद्या प्रसारक शिक्षण संस्थेचे अध्यक्ष, सेक्रेटरी, सर्व संचालक मंडळ, संकुलातील सर्व पदाधिकारी, शिक्षक व शिक्षकेतर कर्मचारी आणि विद्यार्थी वर्गाच्या वतीने वीर जवान कै. माधव सदाशिव गवळी यांच्या पावन स्मृतीस भावपूर्ण श्रद्धांजली आणि गवळी परिवाराप्रति अत्यंत आदरपूर्वक व नम्रतापूर्वक कृतज्ञता
“वीर जवान कै. माधव सदाशिव गवळी अमर रहे!” 🇮🇳
“जय हिंद, जय भारत!” 🌺
