मुळडोंगरी, (प्रतिनिधी ): सरस्वती माध्यमिक विद्यालय, मुळडोंगरी येथील मुख्याध्यापिका सन्माननीय सौ. स्मिता संजय बोरसे मॅडम यांना आदर्श मुख्याध्यापक पुरस्कार प्रदान करण्यात आला. नाशिक जिल्हा माध्यमिक व उच्च माध्यमिक शाळा मुख्याध्यापक संघ, नाशिक आणि सह्याद्री हॉस्पिटल, नाशिक यांच्या संयुक्त विद्यमाने हा पुरस्कार प्रदान करण्यात आला.
सौ. बोरसे मॅडम यांना हा प्रतिष्ठेचा पुरस्कार मिळाल्याने सरस्वती माध्यमिक विद्यालयाच्या शिरपेचात मानाचा तुरा रोवला गेला आहे. त्यांच्या कर्तव्यनिष्ठ, गुणवत्तापूर्ण आणि विद्यार्थीहिताला प्राधान्य देणाऱ्या कार्याची ही पावती आहे. शैक्षणिक क्षेत्रातील त्यांचे योगदान, प्रभावी नेतृत्व, प्रशासकीय कौशल्य आणि विद्यालयाच्या सर्वांगीण विकासासाठी घेतलेले परिश्रम यांमुळे त्यांनी ही गौरवास्पद कामगिरी साध्य केली आहे.
त्यांच्या या यशामुळे विद्यालयातील शिक्षक, शिक्षिका, शिक्षकेतर कर्मचारी आणि विद्यार्थ्यांमध्ये आनंदाचे व उत्साहाचे वातावरण निर्माण झाले आहे. विद्यालयाचे चेअरमन, सर्व शिक्षक-शिक्षिका आणि शिक्षकेतर कर्मचारी यांच्या वतीने सौ. बोरसे मॅडम यांचे मनःपूर्वक अभिनंदन करण्यात आले असून, त्यांच्या पुढील शैक्षणिक व सामाजिक वाटचालीसाठी हार्दिक शुभेच्छा देण्यात आल्या.
“सौ. स्मिता संजय बोरसे मॅडम यांना प्राप्त झालेला आदर्श मुख्याध्यापक पुरस्कार हा त्यांच्या कार्याचा गौरव असून, संपूर्ण सरस्वती माध्यमिक विद्यालयासाठी अभिमानाचा आणि प्रेरणेचा क्षण आहे.”
हार्दिक अभिनंदन व पुढील वाटचालीस मनःपूर्वक शुभेच्छा!
