सेलू : ( प्रतिनिधी ) बोर्डीकर्स पोदार लर्न स्कूल, सेलू येथे भारताचा ८०वा स्वातंत्र्य दिन देशभक्तीमय आणि उत्साहपूर्ण वातावरणात मोठ्या दिमाखात साजरा करण्यात आला. विद्यार्थ्यांमध्ये देशप्रेम, राष्ट्रीय एकात्मता, शिस्त, सर्जनशीलता आणि सांघिक भावना विकसित व्हावी, या उद्देशाने विविध उपक्रम व शाळांतर्गत स्पर्धांचे आयोजन करण्यात आले. स्वातंत्र्य दिनानिमित्त शाळेतील विद्यार्थ्यांची एक्वा, टेरा, वेंटार्स आणि इग्निस या चार सदनमध्ये विभागणी करून विविध स्पर्धांचे आयोजन करण्यात आले. यामध्ये देशभक्तीपर नृत्य, समूहगीत, नाटक, वेशभूषा, भाषण आणि पोस्टर निर्मिती अशा विविध कार्यक्रमांचा समावेश होता. विद्यार्थ्यांनी उत्स्फूर्त सहभाग नोंदवत आपल्या कलागुणांचे प्रभावी सादरीकरण केले. या कार्यक्रमातील विशेष आकर्षण म्हणजे शाळेतील विद्यार्थ्यांनी एकत्रितपणे उभे राहून भारताचा नकाशा साकारला. विद्यार्थ्यांच्या शिस्तबद्ध मांडणीमधून साकारलेला भारताचा नकाशा हा उपस्थितांसाठी अत्यंत भावस्पर्शी आणि अभिमानाचा क्षण ठरला. या माध्यमातून विद्यार्थ्यांनी “एक भारत, श्रेष्ठ भारत” आणि राष्ट्रीय एकात्मतेचा सुंदर संदेश दिला. विविध हाऊसमधील विद्यार्थ्यांनी सादर केलेल्या नृत्य, समूहगीत आणि नाटिकांमधून स्वातंत्र्यसैनिकांचे शौर्य, त्याग आणि देशप्रेम यांचा प्रभावी जागर करण्यात आला. भाषण आणि पोस्टर निर्मितीच्या माध्यमातून विद्यार्थ्यांनी देशाच्या उज्ज्वल भविष्यासाठी आपली जबाबदारी अधोरेखित केली. या संपूर्ण कार्यक्रमाला शाळेच्या प्राचार्या रितू श्रीवास्तव मॅडम यांचे मार्गदर्शन लाभले. त्यांनी विद्यार्थ्यांना स्वातंत्र्याचा खरा अर्थ समजून घेऊन देशाप्रती आपली कर्तव्ये प्रामाणिकपणे पार पाडण्याचे आवाहन केले. विद्यार्थ्यांच्या उत्स्फूर्त सहभागाचे कौतुक करत त्यांनी सर्व सहभागी विद्यार्थ्यांचे अभिनंदन केले. संस्थेच्या अध्यक्षा भावनाताई बोर्डीकर (मुंगसे) यांनी स्वातंत्र्य दिनानिमित्त सर्व विद्यार्थी, पालक, शिक्षक व शिक्षकेत्तर कर्मचारी यांना शुभेच्छा दिल्या. विद्यार्थ्यांनी सादर केलेल्या विविध उपक्रमांचे आणि भारताच्या नकाशाच्या सादरीकरणाचे त्यांनी विशेष कौतुक केले. या कार्यक्रमामुळे संपूर्ण शाळेचे वातावरण देशभक्ती, उत्साह आणि राष्ट्रीय अभिमानाने भारून गेले होते. विद्यार्थ्यांच्या विविधांगी कलागुणांना मिळालेल्या या व्यासपीठामुळे स्वातंत्र्य दिनाचा सोहळा संस्मरणीय ठरला. 🇮🇳 जय हिंद! जय भारत! 🇮🇳
In english
