अंदरसूल ( प्रतिनिधी)मातोश्री शांताबाई गोविंदराव सोनवणे कला, वाणिज्य व विज्ञान महाविद्यालय, अंदरसूल येथे भारतरत्न डॉ. ए. पी. जे. अब्दुल कलाम यांच्या जयंतीनिमित्त वाचन प्रेरणा दिन साजरा करण्यात आला. कार्यक्रमाची सुरुवात मान्यवरांच्या हस्ते दीपप्रज्वलन व प्रतिमा पूजन करून करण्यात आली.
सदर प्रसंगी अध्यक्षस्थानी संस्थेचे प्रशासकीय अधिकारी आर. बी. गायकवाड सर, तसेच कनिष्ठ महाविद्यालयाचे प्राचार्य सचिन सोनवणे, माध्यमिक विद्यालयाच्या मुख्याध्यापिका जयश्री परदेशी व महाविद्यालयाच्या प्राचार्या डॉ. सुवर्णा म्हस्के यांची प्रमुख उपस्थिती होती.
वाचन प्रेरणा दिनानिमित्त विद्यार्थ्यांना वाचनाचे महत्त्व, पुस्तकांचे जीवनातील स्थान आणि वाचनामुळे होणारा बौद्धिक व व्यक्तिमत्त्व विकास याविषयी सविस्तर मार्गदर्शन करण्यात आले. डॉ. ए. पी. जे. अब्दुल कलाम यांच्या जीवनकार्याचा व विचारांचा परिचय करून देत विद्यार्थ्यांनी त्यांच्या प्रेरणादायी जीवनातून जिद्द, चिकाटी, मेहनत आणि ज्ञानाची कास धरण्याची प्रेरणा घ्यावी, असे आवाहन करण्यात आले.
वाचनामुळे व्यक्तीच्या ज्ञानात भर पडते, विचारशक्ती विकसित होते, शब्दसंग्रह वाढतो आणि व्यक्तिमत्त्व अधिक समृद्ध होते. विद्यार्थ्यांनी अभ्यासक्रमातील पुस्तकांसोबतच चरित्रे, आत्मचरित्रे, कथा, कादंबऱ्या, वर्तमानपत्रे आणि प्रेरणादायी साहित्याचे नियमित वाचन करावे. तसेच आजच्या डिजिटल युगात मोबाईलच्या अतिवापरापासून दूर राहून पुस्तक वाचनासाठी वेळ द्यावा, असे मार्गदर्शन यावेळी करण्यात आले.
वाचन ही केवळ ज्ञानप्राप्तीची प्रक्रिया नसून ती व्यक्तीच्या जीवनाला योग्य दिशा देणारी आणि समाजाबद्दलची जाणीव विकसित करणारी सवय आहे. त्यामुळे विद्यार्थ्यांनी वाचनाची आवड जोपासून स्वतःच्या ज्ञानात भर घालावी आणि वाचन संस्कृतीच्या संवर्धनासाठी योगदान द्यावे, असा संदेश या कार्यक्रमातून देण्यात आला.
सदर कार्यक्रमाचे आयोजन सांस्कृतिक विभागप्रमुख यांच्या मार्गदर्शनाखाली करण्यात आले. कार्यक्रमाच्या यशस्वी नियोजनासाठी त्यांनी विशेष प्रयत्न केले. कार्यक्रमाच्या माध्यमातून विद्यार्थ्यांमध्ये वाचनाची आवड निर्माण करणे, ज्ञानार्जनाला प्रोत्साहन देणे आणि डॉ. ए. पी. जे. अब्दुल कलाम यांच्या विचारांचा प्रसार करणे हा उद्देश साध्य करण्यात आला.
सदर प्रसंगी मयूर भागवत, मयूर खैरनार, नरेश निकम, गणेश अमोदकर, संकेत सोनवणे, प्रतीक्षा वाकचौरे, शीतल भागवत, प्रतीक्षा साळुंके, सोनाली चंद्रटिके, श्रद्धा कोकाटे, चंचल कोतकर, यांच्यासह सर्व शिक्षकवृंद, शिक्षकेतर कर्मचारी व विद्यार्थी मोठ्या संख्येने उपस्थित होते.
