सिन्नर: ( प्रतिनिधी ) महाराष्ट्र राज्यातील सन २०२६ मधील गंभीर दुष्काळ परिस्थिती लक्षात घेता, राज्य सरकारने तातडीने अधिकृत दुष्काळ जाहीर करावा आणि संकटात सापडलेल्या शेतमजूर बांधवांना थेट आर्थिक मदत द्यावी, अशी आग्रही मागणी बहुजन मुक्ती आंदोलन राष्ट्रीय संघटनेचे महाराष्ट्र राज्य प्रदेशाध्यक्ष मा. प्रविणजी जगताप यांनी केली आहे. या संदर्भात त्यांनी राज्याचे मुख्यमंत्री मा. श्री. देवेंद्रजी फडणवीस साहेब यांना जाहीर पत्र पाठवून प्रशासनाचे लक्ष वेधले आहे.प्रविणजी जगताप यांनी पत्रात नमूद केले आहे की, यंदा राज्यातील बहुतांश भागांत पावसाने दगा दिल्यामुळे पिके हातची गेली असून शेतकरी आणि शेतमजुरांवर उपासमारीची वेळ आली आहे. शेतीची कामे ठप्प झाल्याने ग्रामीण भागातील शेतमजुरांचे जगणे असह्य झाले आहे.पत्रातील प्रमुख मागण्या पुढीलप्रमाणे आहेत:अधिकृत दुष्काळ जाहीर करा: राज्यातील बाधित जिल्ह्यांमध्ये कोणतीही दिरंगाई न करता तत्काळ अधिकृत दुष्काळ घोषित करण्यात यावा.
शेतमजुरांना थेट आर्थिक मदत: हाताला काम नसलेल्या सर्व शेतमजूर बांधवांच्या बँक खात्यात शासनाने थेट (DBT) आर्थिक मदत जमा करावी.
रोजगार हमी योजनेची कामे: ग्रामीण भागात ‘मनरेगा’ (रोजगार हमी योजना) अंतर्गत मोठ्या प्रमाणावर कामे सुरू करून मजुरांना स्थानिक पातळीवरच रोजगार उपलब्ध करून द्यावा.
पाणी आणि चारा छावण्या: टंचाईग्रस्त भागात पिण्याच्या पाण्याची तसेच जनावरांसाठी चारा छावण्यांची त्वरित व्यवस्था करण्यात यावी.
राज्यातील सद्यस्थिती अत्यंत चिंताजनक असून सरकारने यावर संवेदनशीलतेने आणि युद्धपातळीवर निर्णय घेणे गरजेचे आहे. शेतमजूर हा ग्रामीण अर्थव्यवस्थेचा मुख्य कणा आहे, त्यामुळे मुख्यमंत्र्यांनी या पत्राची दखल घेऊन पीडित जनतेला त्वरित दिलासा द्यावा, अशी तीव्र भावना बहुजन मुक्ती आंदोलनाच्या वतीने व्यक्त करण्यात आली आहे.
