नाशिक ( प्रतिनिधी ): पेठ रोड येथील श्रीनिवासा रेसिडेन्सीमध्ये गणेशोत्सव २०२६ मोठ्या उत्साहात, आनंदी आणि उत्सवी वातावरणात साजरा करण्यात आला. ए व बी विंगच्या संयुक्त विद्यमाने आयोजित या गणेशोत्सवात विविध बौद्धिक, मनोरंजक, सांस्कृतिक व कलात्मक स्पर्धांचे आयोजन करण्यात आले होते.
गणेशोत्सवानिमित्त संगीत खुर्ची, पोतेउडी, लिंबू-चमचा, इंग्रजी स्पेलिंग बी, वन मिनिट गेम, डान्स, भाषण, स्लो सायकल रेस, गीत गायन, जनरल नॉलेज, रांगोळी आणि पाककला अशा विविध स्पर्धा घेण्यात आल्या. लहान मुलांसाठी विशेष किड्स स्पर्धांचे आयोजन करण्यात आले होते. या स्पर्धांना विद्यार्थी, महिला, पुरुष तसेच ज्येष्ठ नागरिकांचा उत्स्फूर्त प्रतिसाद लाभला.
रविवार, दि. २७ सप्टेंबर २०२६ रोजी विविध स्पर्धांतील विजेत्यांचा बक्षीस वितरण समारंभ उत्साहात पार पडला. मान्यवरांच्या हस्ते विजेत्यांना बक्षिसे व प्रमाणपत्रे देऊन गौरविण्यात आले. तसेच सर्व सहभागी स्पर्धकांचेही कौतुक करून त्यांचा उत्साह वाढविण्यात आला.
या संपूर्ण गणेशोत्सवाच्या यशस्वी आयोजनासाठी श्रीनिवासा मित्रपरिवारातील सर्व सदस्यांनी विशेष मेहनत घेत मोलाचे सहकार्य केले. रहिवाशांच्या उत्स्फूर्त सहभागामुळे गणेशोत्सवाला केवळ धार्मिक उत्सवाचे स्वरूप न राहता सामाजिक, सांस्कृतिक आणि मनोरंजनात्मक स्वरूप प्राप्त झाले.
या उपक्रमातून परिसरातील रहिवाशांमध्ये आपुलकी, स्नेह, संवाद आणि एकोप्याची भावना अधिक दृढ झाली. लहानांपासून ज्येष्ठांपर्यंत सर्वांनी एकत्र येत उत्सवाचा आनंद घेतल्याने श्रीनिवासा रेसिडेन्सीतील गणेशोत्सव संस्मरणीय ठरला.
“उत्सवातून आनंद, सहभागातून एकोपा आणि एकोप्यातून सुंदर समाज” याचा सुंदर अनुभव श्रीनिवासा रेसिडेन्सीतील गणेशोत्सवातून पाहायला मिळाला.
