गोंदे दुमाला (ता. इगतपुरी) : येथील जिल्हा परिषद प्राथमिक शाळेत स्वातंत्र्य दिन मोठ्या उत्साहात आणि आनंदमय वातावरणात साजरा करण्यात आला. पावसाची संततधार सुरू असतानाही गावातील शिक्षणप्रेमी नागरिकांनी मोठ्या संख्येने उपस्थित राहून कार्यक्रमाची शोभा वाढवली.
कार्यक्रमाची सुरुवात ध्वजारोहणाने झाली. यानंतर शाळेतील शिक्षकांच्या मार्गदर्शनाखाली विद्यार्थ्यांनी देशभक्तीपर गीतांवर आधारित संगीतमय कवायत सादर केली. चिमुकल्या विद्यार्थ्यांच्या शिस्तबद्ध आणि आकर्षक सादरीकरणाने उपस्थितांची मने जिंकली.
यावेळी केंद्रप्रमुख साहेबांनी विद्यार्थ्यांना मार्गदर्शन करत शिक्षणाचे महत्त्व, शिस्त आणि देशप्रेम याबाबत प्रेरणादायी विचार व्यक्त केले. शाळेचे मुख्याध्यापक यांनीही स्वातंत्र्य दिनाचे महत्त्व सांगत विद्यार्थ्यांना उज्ज्वल भविष्यासाठी शुभेच्छा दिल्या.
पावसाची पर्वा न करता ग्रामस्थांनी दाखवलेला उत्स्फूर्त सहभाग हा शाळा आणि गावातील शिक्षणप्रेमी वातावरणाचे प्रतीक ठरला. शिक्षक, विद्यार्थी आणि ग्रामस्थांच्या सहकार्याने स्वातंत्र्य दिनाचा कार्यक्रम उत्साहपूर्ण वातावरणात संपन्न झाला.
